113.මැදියම් රෑ බලු මෙහෙයුම

අපේ ෂැඩෝ පැනල ගිහිං, නැගිටින්නකො...

දහසක් බුදුන් බුදුවන පාන්දර සැප නින්දක ගිලී හිටපු මම බිරිඳගෙ සද්දෙට අවදිවුනා...ඇස් පිහිදාල බලපුවම වෙලාව මහ පාන්දර හතහමාරයි...

නැගිටින්නකො අනේ ආයෙම හරිබරි ගැහිල නිදාගත්තෙ, මම තේත් හැදුවා බීල ගිහිං මූණ හෝදගෙන එන්නකො අන්න මං අඟුරු කෑල්ලකුත් ලිඳ ළඟ තියල ඇති...

මොන කරදරයක්ද මන්ද  නිදාගන්නවත් නෑ, බල්ලටත් මේ උදේ පාන්දරම පැනල යන්න ඕනැඋනානෙ...ඊයෙ අර බ්ලොග්කාරයො දෙන්න බලු කූඩුව ලඟට වෙලා බලාගෙන හිටිය නේද, ෂුවර් එකටම උන් දෙන්නට බයවෙන්න ඇති...

බයවෙලාද නැත්නං ඒ ගොල්ලන්ව හොයාගෙන ගිහින්ද දන්නේ නෑ අනේ උදේම...කෝකටත් දවල් වෙලා කෝල් එකක් දීල බලන්නකො...

අනේ මන්ද අප්පා තියන ලෙඩ මදිවට බල්ලොත් ලෙඩ දෙනවනෙ...

උදේට කන්න චූං පාන් අරගෙන පොල් සම්බෝලයක් තලල තිබුණා,කහ ත්‍රී වීල් එකේ ගෙනියන පාන් කොහොමත් හොඳයි...මිනිහ ගේන්නෙ දර පෝරණේ පුච්චන පාන්,අනික් උන් නං ඔක්කොම විකුණන්නෙ ගෑස් පාන්,පුම්බල විතරයි කාපු වෙලේ ඉඳන් බඩ දනවා...මම කුස්සියෙ ලිබ්බොක්කෙ ඉඳගෙන පාන් කන තැනට වෙලා බිරිඳ බල්ල ගැන කියවන්න ගත්තා...

අපේ සැළකිලි හොඳ නැති හින්දනෙ ගියෙ හොඳ තැනක් හොයා ගන්නෙ නැතැයි...මම නං හොයන්න යන්නෙ නෑ එනව නං ආපුදෙන් ඇයි අනේ අපි දරුවෙකුට වගේ මෙච්චර සලකද්දී කිසිම තැකීමක් නැතුව පැනල ගියානං ඒ වගේ ගුණමකු උන් ආයෙ මොකටද...දවසකුත් මට ඔහොම වැඩක් කලානෙ, ගේට්ටුවෙන් එළියට පැනල මාව වත්තෙ පාරවල් ගාණක ගෙනිහින්...මාත් ඉතිං මගඇරෙයි කියල පස්සෙන්ම ගියා මෙයා මගේ දිහා බල බලා දිව්වනෙ,කොච්චර කතාකළාද නැවතුනේ නෑනෙ,අන්තිමේදි ලෙස්බියන්ලගෙ ගේ ගාවදි අල්ල ගත්තෙ...

බිරිඳගේ නෝක්කඩු ඉවරයක් නෑ...උදේ බල්ලට දොස් කිය කියා හිටියට ඉර මුදුන් වෙද්දී ඇයගෙ කෝපය ශෝකයකට පරිවර්තනය වුනා...

බලන්ඩකො අනේ ෂැඩෝ තාම ආවේ නෑනෙ උදේ කිරි එක බීපු ගමන් දවස් දෙකකින් කෑම කෑවෙත් නෑ බත් එක හදල දුන්නම උඩින් පල්ලෙන් ඉවකරල නිකාහිටිය...වතුර ටිකක්වත් කවුරුවත් දෙන එකක්යැ...

දුන්නත් බොන්න දන්නවයැ ටැප් එකට කට අල්ලල වතුර බොන එකා...

අන්න අන්න අර පහළ පැත්තෙන් බල්ලො බුරනව ඇහෙනව අපේ එකාටද දන්නෙ නෑ ගිහිං බලන්ඩකො...

දැන් බලන්ඩ මේ පැත්තෙන් බල්ලො රැළ ලුණුමිරිස්ලගෙ කොස්ගහ ළඟ ඇම්බුෂ් එක දාගෙන ඉන්නව කිසිම පිට බල්ලෙකුට උන්ගෙ ඒරියල් එකට එන්න දෙන්නෙ නෑ බුරල එලෝනව...එතකොට ඉස්සරහ පැත්තෙන් ගුණසේකරලගෙ බල්ල ඇම්බුෂ් එක දාගෙන ඉන්නව උගෙ ඒරියල් එකේ...ඔය දෙක අතරෙ මාග හැම තිස්සෙම පැට්‍රෝල් යනව, ඔය බල්ලො ටික එකෙක් නෑර උන්ගෙ පොයින්ට්වල ඉන්නව...මම ගිහිං බැලුව, ෂැඩෝ කොහොම මුංගේ ඇස්වහල පැනගත්තද කියල මට හිතාගන්නවත් බෑ...

                                         පැට්‍රොල් යන මාගෝ

වෙලාවට අද පුතත් ක්ලාස් ගිහින්නෙ, ඒ ළමයි දෙන්න හිටියනං මෙලහකටත් බල්ලව හොයාගෙන ඇවිත්...පොතක් දිග ඇරගෙන ඉඳගත්තහම ඔයාටත් මෙලෝ සිහියක් නෑනෙ  ගිහිං බලල එන්ඩකො අහළ පහළවත්...

අව්ව ටිකක් බැස්සහම ගිහිං බලන්නං, කොහෙද මේ ගිණි අව්වෙ බල්ලො හොයනව තියා එළියට බහින්ඩවත් පුළුවන්යැ...

අනේ මට බය මේකා වාහනේකටවත් යටවෙයි කියල පුරුදු නෑනෙ මොන වයසක්ද, පෙනුමට හිටියට තවම පැටියනේ...අපේ ඔෆිස් එකේ විජේනායකගේ බල්ලත් ඔහොම පැනල ගිහිං හෙව්වට හෙව්වට හම්බවෙලා නෑ කොහොම හරි දවස් දෙකකට පස්සෙ කොහෙද ඉඳල ගෙදර ඇවිත්,හොඳටම අසනීපවෙලා, ඇවිදින් දවස් දෙකයි ජීවත් වෙලා තියෙන්නෙ වකුගඩු ආසාදනයක්ලු...

වකුගඩු ආසාදනයක්ය කියල ලැජ්ජාවට කිව්වට ඔය වෙන ආසාදනයක් වෙන්න ඇති...

වෙන කොහෙ ආසාදනයක් වෙන්නද...

ඔය එළියෙ තියෙන අවයව වල එහෙම, ඇයි එහෙම වෙන්න බැරිද ඌ පැනල ගියෙත් බැල්ලියොත් එක්ක කං සැප විඳින්ඩ නොවැ හොඳයි බොරුද...

ඔය කිව්වෙ ඔන්න කිව්ව,ඔයාලටත් ඉතිං කතාකළොත් ඔය අවයවේ ගැනම තමයි ,මං කියන්නෙ නෑ ඉතිං කොහෙන් පටන් ගත්තත් අන්තිමට ඔය අවයවේට ඇවිත් තමා නවතින්නෙ...

නෑ මං නිකමට වගේ කිව්වෙ මට නං ඉතිං ඔව්වයෙ එච්චර ගාණක් නෑනෙ ...

මිනිස්සු බල්ලව අල්ලගනීද දන්නෙ නෑ නේද අනේ, එහෙමත් කරනවලුනෙ...

එහෙනං, බල්ලො ඇතිකරන මනුස්සයෙකුට එහෙම අහුවුණොත් ඉතිං බඩුම තමයි අල්ලල බැඳගන්නවා...

ඒත් ඉතිං එහෙමත් බෑනෙ මෙයාගෙ කොළ ඔක්කොම අපි ගාවනෙ තියෙන්නෙ, මොන මොන බේත් විදලද මොනව විදල නැද්ද කියල අල්ලගත්ත මිනිහ කොහොමද දන්නෙ...

ඔයත් හරියට නස්රුදින්ගෙ මස්ටික කපුට ගෙනිච්ච කතාව වාගෙ එකක්නෙ කියන්නෙ...

ඒ මොකද්ද ඒ නස්රුදීන්ගෙ කතාව...

ඇයි අහල නැද්ද,නස්රුදින් දවසක් කඩෙන් මස් කුට්ටියක් අරගෙන ඔය මස් කුට්ටිය බොහොම රසට හදන හදන විදියත් කොලේක ලියාගෙන ගෙදර යනවලු, එකපාරටම කපුටෙක් මස් කුට්ටිය ඩැහැගෙන ගිහිං...නස්රුදින් කලබල වෙලා නෑ, මිනිහ කෑ ගහල කපුටට කිව්වලු...

හූ...උඹ මහලොකුවට මස් කුට්ටිය විතරක් අරං ගියාට වැඩක් ඇතැයි,රෙසිපි එක මගෙ අතේනෙ මෝඩ කපුටෝ...

බඩගිනිද...

බඩගිනිත් ටිකක් තියනව...

මම කෑම බෙදනකල් ඔයා නාල එන්ඩකො...

දවල්ට කන්න තිබුනෙ කතුරුමුරුංග මල් හොදියි බතුයි...

චැහ් අම්මප මේවත් කන්න පුලුවන්ද මනුස්සයෙකුට...

කෑම නං හරි නෑ තමයි, කොහෙද මේ බල්ලගෙ කරදරෙත් එක්ක මොකුත් උයාගන්න බැරිඋනානෙ,පපඩමක් බැදල දෙන්නද...

පපඩං හොඳයි පොඩි උන් රවට්ටන්ඩ,මහ ලොකු පපඩම...

තියෙන විදියට කන්ඩ අනේ,මේ අමාරු කාලෙ අපට දෙවේලක්වත් කන්ඩ ලැබෙන එක කොච්චර දෙයක්ද, රෑටවත් හොඳට උයල දෙන්නංකො...

උදේ හදපු පොල් සම්බෝලෙ ඉතුරු වෙලා තියනවනං ටිකක් දෙන්ඩකො ඒක එක්කවත් බත් ටිකක් කන්ඩ බලන්නං...

මට නං කන්ඩ පිරියකුත් නෑ බල්ල බඩගින්නෙ කියල මතක් වෙනකොට, හාමතේ  වේලිලා ඔහේ තැන තැන දුව දුවා ඇති කාගෙන්වත් ඉල්ලන්ඩ කියලයැ...අනේ ඇත්තට අපි මෙහෙ ගිණි පත්තුවෙලා ඉන්නව කියල මූට පොඩ්ඩක් වත් හිතෙන්නෙ නැති හැටි...

බල්ල පැනල ගිහිං  අපට මෙච්චර දුක නං දරුවෙක් පැනල ගියාම දෙමවුපියන්ට කොච්චර දුක ඇද්ද...

කොහෙහරි හොඳින් ඉන්නවනං හිත හදාගන්න බැරියැ, ඒ උනාට බඩගින්නෙ එහෙ මෙහෙ දුවනකොට වාහනේකටවත් යටවුනොත් කියලයි මට හිතේ ගින්දර...

ඔයවගේ අපි බෙන් එකේ ඉන්න කාලෙ බෙනට්ගෙ බල්ල පැනල ගියානෙ, අපි මාර ඔපරේෂන් එකක් කළා ඌව හොයාගන්න...

ඉතිං හම්බවුනාද...

හම්බවුනා නේන්නං පහුවදා...බල්ල පැනල ගිය වෙලාවෙ බෙනට් කෙලින්ම ආවේ අපිව හොයාගෙන...

මල්ලි අපේ රෝවර් පැනල ගිහිල්ලනෙ...

ඉතිං බෙනට් අයියෙ හෙව්වෙ නැද්ද...

හැමතැනම හොයල හොයල බැරිම තැන තමා මල්ලි මේ ආවේ...

ඉතිං දැන් මොකද කරන්න හදන්නෙ...

දැන් කරන්න තියෙන්නෙ මේකයි, උඹල කොළ ටිකක දැන්වීම් පහළොවක් විස්සක් ලියල මේ වටපිටේ අලවපල්ල වැඩිපුරම පැලවත්ත පැත්තෙ එහෙම...

අපි කට්ටිය  එකතුවෙලා දැන්වීම් ටික ලිව්වා...

                                           
                                               සොයාදෙන්න

                   රෝවර් නමැති කළු පැහැති බල්ලා(දුඹුරු කකුල්)පසුගිය 
                   බදාදා මඳ වැසි සහිත අඳුරු සැන්දෑවේ සිට අතුරුදහන්වී ඇත.

                   බෙල්ලේ  කළු පටියකි. දුටු කෙනෙක් ඇත්නම් පහත 
                   ලිපිනයට හෝ දුරකථනඅංකයට වහාම දැනුම් දෙන
                   ලෙස ඉතා කරුණාවෙන් ඉල්ලා සිටිමි.

                   27,නාගහමුල්ල පාර,
                   පන්නිපිටිය පාර,
                   බත්තරමුල්ල.

ඒ කාලෙ මොබයිල් පෝන් තිබුණු එකක්යැ බෙනට්ගෙ ගෙදර නොම්මරේ යටිං ලිව්වා...

බෙනට් අයියෙ නිවැරදි තොරතුරක් දුන් කෙනෙකුට වටිනා ත්‍යාගයක් පිරිනමමි කියලත් යටින් ලියන්නද...

නෑ නෑ ඕනැ නෑ ඔය ලිව්ව ටික මදැයි,කෝ මෙහෙට ගනිං බලන්න...මොනවද මල්ලි උඹලගෙ සාහිත්‍යය, බල්ලව හොයන්නත් උඹලට සාහිත්‍යය නැතුව බෑ නේද...මද වැසි,අඳුරු සැන්දෑව ඕව මොන කෙහෙම්මලකටද...

අපි මුවින් නොබැණ දැන්වීම් ටික අරං  ගිහිං අලෝල ආවා...

පහුවදා මම වැඩට ගිහිං ආපහු එනකොට බෙනට් සිනා උතුරවමින් බෙන් ෆිල්ම්ස් එකට එනවා...

මල්ලි රෝවර් හම්බවුනානෙ...

කොහෙද හිටියෙ බෙනට් අයියෙ...

පාර්ලිමේන්තු පිට්ටනියෙ,අපේ දැන්වීම දැකපු කෙනෙක් මට පෝන් කළා ගිහිං බලනකොට මෙයා ඉන්නව බලු රැළක් එක්ක දුව දුවා...කතාකරපුවම දුවගෙන ආව කාරෙකේ දාගෙන කෙලින්ම ගෙදර ගෙනත් පැනඩෝල් දෙකක් දීල කිරිත් හදල බොන්න දීල කූඩුවට දැම්ම දැන් ඕන් නිදි...

දැක්කද බෙනට් අයියෙ අපේ දැන්වීමෙ වටිනාකම...

පැනඩෝල් දීල හරියන එකක් නෑ ඕකව වී ඩී ක්ලිනික් එක්ක ගියානං තමයි හොඳ,දැන් නිදියන්නෙ ඊයෙ රෑ තිස්සේ ඇහැරලා ඉන්න ඇති...

බෙනා ගියාට පස්සෙ අපි කතාවුණා...

ඒ වෙනකොට බල්ල නැතිවුණු එක අපේ ගමේ ඔක්කොම අයයි අහළ පහළ ගම්වල බාගයක් විතරයි දැනගෙන ඉවරයි,බිරිඳ ගේ ඉස්සරහ ඉඳගෙන පාරෙ යන ඔක්කොම දැනුවත් කරනවා...

අපේ බල්ල උදේ පැනල ගිහින්නෙ අනේ දැක්කොත් පණිවිඩේ කියන්න හොඳද...

ෂැඩෝ ගැන පළවෙනි ආරංචිය ලැබුනෙ හවස පහට විතර, ළඟ ගෙදරක පොඩි ගෑනු ළමයි දෙන්නෙක් ඉස්කෝලේ ගිහිං එද්දී  බල්ල කනත්තෙ ඉන්නව දැක්කලු...

අපි දැක්කෙ ඉස්කෝලේ ඇරිල එද්දි දෙකට විතර, බල්ල කනත්තෙ ගෙයි සිලි සිලි බෑග් එකක් එක්ක සෙල්ලං කර කර හිටිය, අපි දන්නෙ නෑනෙ මෙහෙ බල්ල නැතිවෙලා කියල නැත්නං ආපු වෙලාවෙම කියනව...

අනේ අපි යමු මාත් එන්නං...

ඇයි පයින්ම යන්නද...

ඔව් ඔය ටික පයිම්ම යමු...

අනේ මට නං ඔච්චර දුර පයින් යන්න බෑ චන්දනටවත් කතාකරගෙන යමු...

ඒ ගමන චන්දනටත් කතා කරගෙන ගිහිල්ල කනත්තෙයි ඒ අවට හැම තැනමයි හොයල බැලුවට ෂැඩෝ හිටියෙ නෑ...

මම ඔය කියන බල්ලව උදේ අටට විතර අන්න අර සර්විස් ස්ටේෂන් එක ළඟ ඉන්නව දැක්කනෙ,ඔයාලගෙ බල්ල කියල දන්නෙ නෑනෙ වාහනවලට හුරු නෑ නේද...

ඔව් ඔව්...

ඒක තමයි වාහන එද්දී එහාට මෙහාට පැන පැන හිටියෙ...

චන්දන කිව්වා...ඒ පැත්තෙ අයටත් පණිවිඩේ දීගෙන හිස් අතින්ම අපි ගෙදර ආවා...

හවස මගේ පණිවිඩේට ලොක්කයිය අපේ ගෙදර ආවත් ඒ අහිංසකයට ප්ලේන්ටියක්වත් දෙන්න විදියක් නැති නිසා මම ලොක්කට පස්සෙ එන්න කියල කිව්වා...

 ෂැඩෝ නැතුවම රාත්‍රිය ළඟාවුණා රෑටත් අපට හරියකට කෑමක් ලැබුනෙ නෑ, චූං පාන් අරගෙන කිරිහොදිත් එක්ක කෑවා...කිසිම කතාබහක් නැතුව කට්ටියම කල්පනා කර කර ඉඳල ගොළුවො වගේ නින්දට ගියා...නින්ද ගියා විතරයි බිරිඳගෙ මොබයිල් එක දිගටම නාදවෙන්න ගත්තා...

ට්‍රීන්...ට්‍රීන්  ට්‍රීන්... ට්‍රීන්  ට්‍රීන්...ට්‍රීන්

පෝන් එකට උත්තර දෙන බිරිඳගෙ ඇස් ප්‍රීතියෙන් දිලිසෙන්න ගත්තා...

 ෂැඩෝ ඉන්නවලු චන්දන කතාකළේ විනාඩි පහකින් එනවයි කිව්වා යන්න ලැස්තිවෙලා ඉන්නලු...පුතේ පුතේ ඉක්මනට ඇඳගෙන එන්න තාත්තත් එක්ක බල්ලව ගේන්න යන්න...

චන්දනත් එක්ක අපි පිටත් වුනා වේගයෙන් ගිය චන්දන විනාඩි දෙක තුනකින් අපේ වත්ත කෙළවරේ තියෙන පාරකින් ඇතුළට දාල කොත්තු විකුණන රෑ කඩයක් ළඟ නතර කළා...දවල් අපි පණිවිඩේ කියපු සර්විස් ස්ටේෂන් එකේ කෙනා එතන හිටියා,චන්දනට පණිවිඩේ දීල තියෙන්නෙ එයා තමයි...

උදේ ඉඳලම බල්ලෙක් මෙහෙ කැරකෙනව කොහෙ හරි ගෙදරක හදපු බල්ලෙක් කියල අපි දැනගත්ත,මම අල්ලන්නත් හදල නිකාහිටියෙ රෑටම බැඳල තියනව කියල හිතාගෙන...

කඩේ කොත්තු ගහමින් හිටපු කන්නාඩියක් දාගත්ත ප්‍රසන්න පෙනුමැති හීනි තරුණයා අපිට කිව්වා...

ඔන්න ඔය පැත්තෙ ඇති කතා කරන්නකො...

කතා කරපුවම පාරෙ ඈත කෙළවරේ ලයිට් කණුව ලඟින් මතුවුණු  ෂැඩෝ මොහොතකට ආපහු හැරිල ගිහිං ආයෙම වේගයෙන් දුවගෙන ඇවිත් අපිළඟ බිම නිදාගත්තා,මම දැක්කෙ හරියටම ෂැඩෝ අපි එනකං බලාගෙන හිටිය වාගෙයි...දංවැල දාගෙන ගෙනත් ත්‍රීවීල් එකට දාගෙන ගේන්න බලපුවම මෙයා චන්දනට ගොරවන්න ගත්තා...

එහෙනං ඔය දෙන්න ෂැඩෝව පයින් එක්කරන් එන්න...

එහෙම කියල චන්දනයි මමයි ගෙදර ආවා...බිරිඳ අපි එනතුරු නොඉවසිල්ලෙන් බලං හිටියෙ, විනාඩි කීපයකින් ෂැඩෝ එක්කගෙන පුතා ගෙදරට ළඟාවූනා...ආපු ගමන්ම දුන්න වතුර බීගෙන බීගෙන ගියා...

ඉන්න ඉන්න වතුර දෙන්න එපා මම කිරි ටිකක් හැදුවා...

ෂැඩෝ කිරි ටික  වේගෙන් බීල බාජනෙත් ලෙවකාගෙන ගියා...

පව් අනේ දවසෙම කන්නවත් බොන්නවත් නැතුව වේලිලා ඉඳල තියෙන්නෙ...

බිස්කටුත් කන්න දීල ෂැඩෝව කූඩුවට දැම්මා, මගෙ හිතේ තිබුනෙ නං පොල්ලකින් දෙකක් සළකන්නයි,ඒ උනාට ගහගන්න හම්බවුනේ නෑ...ෂැඩෝ ගෙදර ගෙනාවට පස්සෙ නං කේක්,කෙසෙල්ගෙඩි,බිස්කට් කෝපි ආදියෙන් සමන්විත සංග්‍රහයක් මදි නොකියන්න ඒ මහ රෑ  අපට ලැබුනා.

(ප.ලි . මාතෘකාව හෙන්රිගේ අනවසරයෙන් උපුටා ගත්තකි)