142.ෆිෆා සහ රහුමාන් මාස්ටර්.

අනුන්ගෙ මගුල් ලියනව ඇරෙන්න තොට වෙන දෙයක් ලියන්න බෑ කියල ඇනෝ පිංවතෙක් මේ ලඟදි දවසක මට පිං අනුමෝදන් කර තිබුණා.ලියපු එකේ අර්ථය ඒක වුනාට වචන නං වෙනස් වචන ටික මට දැන් මතක නෑ සහ ඒ කමෙන්ටුව දැන් සොයාගන්නට නැති නිසා ආපහු බලන්න විදිහකුත් නෑ.

ඉතිං පහුගිය සතිය පුරාම මම කල්පනා කලේ අරූට මෙහෙම වුනා මූට මෙහෙම උනා කියල නොලියා මටම පුද්ගලිකව වෙච්ච දේවල් ලියන්න නං කොච්චර කතා තියෙන්න උවමනාද කියල සහ එහෙම අනුන්ගෙ දේවල් ලියන්න බැහැ කියා නීතියක් හෝ රීතියක් මේ බ්ලොග් අවකාශේ තියෙනවද කියලයි.එහෙම හිතාගෙන මම කියවන බ්ලොග්වල පරණ කතා පවා බලපුවම ඒ බ්ලොග්වලත් අනුන්ගෙ කතා අපුරුවට ලියල තියෙනවා.ඒ නිසාවෙන් මම හිතාගත්තෙ මේ කතාව මට විතරක් කියාපු දෙයක් වෙන්න ඇති කියලයි.

ඇත්තම කිව්වොත් මට නං එච්චර ලියන්න පුද්ගලික අත්දැකීම් නැහැ මොකෝ ලියනව කියල පවුල කුස්සියට වෙලා මාළු උයන හැටි ලියන්ටයැ.ඔන්න ඔය කාරනාව ගැන හිත වෙහෙසවමින් මම පහුගිය සතියම ගතකල නිසා මොකුත්ම ලියාගන්නට බැරිවුනා.

ඊයෙ රාත්තිරියෙ නිදිමරාගෙන ෆිෆා සෙමි ෆයිනල්ස් බලද්දී මට කතාවක් මතක් වුනා.හැබැයි ඉතිං මේකත් අනුන්ගෙ කතාවක්. බැන්නත් මොනා කරන්නද, තරහ අවසර කියල ඒ කතාවත් ලියන්නං.

කින්නියාවෙ දර්ශනීය සෙල්ලං පිට්ටනිය හෙවත් ග්‍රවුන්ඩ් එක ෆෙරියට මීටර් හාර පන්සීයක් දුරින් පිහිටා තිබුණා.කින්නියාවෙ කොල්ලො කෙල්ලො ඔක්කොම සෙල්ලං කලේ තරඟ පැවැත්වුවේ මේ ග්‍රවුන්ඩ් එකෙයි.රහුමාන් මාස්ටර්ගේ ගේ පිහිටලා හිබුනෙත් ඒ කිට්ටුවමයි.

ඔන්න එදා තිබුන පුට්බෝල් මැච් එක කින්නියාවෙම පාපන්දු කණ්ඩායම් දෙකක් අතර නිසා තරඟය බලන්නට ගොඩක් දෙනා ඇවිත් හිටියා.සෙනග වැඩිවෙන්න තවත් කාරණයක් වුණේ කණ්ඩායම් දෙක අතර තිබුණු බද්ධ වෛරයයි.හරියට ඉන්දියාව සහ පාකිස්තානය ගහන මැච් එකක් වගේ මේ කණ්ඩායම් දෙකත් හමුවුන තැන්වල ගහමරා ගැනිලි ගෝරි බෝරිවලින් කිසිම අඩුවක් වුණේ නෑ.

ඉතිං මෙන්න මේ වගේ බොහොම භයානක ට්‍රැක් රැකෝඩ් එකක් තියෙන මේ කණ්ඩායම් දෙක අතර  පාපන්දු තරඟය කින්නියාවෙ පිට්ටනියේ උත්සවාකාරයෙන් ආරම්භ වුනා.පාපන්දු තරඟයේ විනිශ්චයකරු හෙවත් රෙෆ්රි හැටියට අපේ හිතවත් රහුමාන් මාස්ටර් කටයුතු කළා.රනිංෂෝටකුත් ටී ෂර්ට් එකකුත් ඇඳගෙන විස්ල් එකකුත් කටේ ගහගත්තු රහුමාන් මාස්ටර් තමන් දන්නා උපරිමයෙන්ම කැපවෙමින් විනිශ්චය කටයුත්ත කලේ පොඩ්ඩ බැරිවුනොත් ඇතිවෙන අවාසනාවන්ත තත්වය ගැන හොඳින්ම දන්නා නිසායි.

නමුත් කල් යල් බලා අවාසනාව පලදුන්නා. තරඟයේ දෙවෙනි භාගයේ එක කණ්ඩායමක ක්‍රීඩකයෙකුගේ නීති විරෝධී ක්‍රියාවක් හෙවත් ෆවුල් ප්ලේ එකක් හේතුවෙන් රහුමාන් මාස්ටර් අනික් කණ්ඩායමට ලබාදුන් දඬුවම් පහරින් ඔවුන් ගෝලයක් වාර්තා කිරීමත් එක්කම ක්‍රීඩකයන් තුල මතුවී ආ නොසන්සුන්තාවට ආධාරකරුවන්ගේ දැඩි විරෝධයද එල්ල වීම නිසා  ක්‍රීඩා පිටියට කඩා වැදුණු නරඹන්නන් සුළු මොහොතකින් තරඟය එකම යුද්ධයක් බවට  පරිවර්තනය කළා.

මේ කලබල අස්සෙන් රිංගල පිට්ටනියෙන් එලියට පැනගන්නට රහුමාන් මාස්ටර්ට හැකිවුනා.ඔහුගේ එකම අභිමතාර්ථය වුණේ ගෙදරට දුවගැනීමයි.නමුත් රහුමාන් මාස්ටර් පැනල දුවනවා දැකපු එක ආධාරකරුවෙක්...

අන්න අන්න රෙෆ්රියා පැනල දුවනවා අල්ලගනියව් ඕකා තමයි ඔක්කොම කලේ...

කියනවත් එක්කම කීපදෙනෙක් රහුමාන් මාස්ටර්ගේ පස්සෙන් එළවන්න ගත්තා,රහුමාන් මාස්ටර්ට ලංවුණු එකෙක් ඔහුගෙ ටී ෂර්ට් එකෙන් අල්ල ගත්තා මාස්ටර් දුවපු වේගෙට ටී ෂර්ට් එකේ පිට ගැලවිලා අල්ලගත්ත එකාගේ අතට ආවත් මාස්ටර්ව අල්ලගන්න ලැබුනෙ නෑ. 

ඇඳුම ඉරාගෙන කෑලි එල්ලී එල්ලී හැති දමාගෙන දුවන් ඇවිත් මාරාවේෂයෙන් ගෙට කඩාවැදුණු රහුමාන් මාස්ටර් දැකපු ගෙදර අය හොඳටම බයවුනා.

ඇයි ඇයි මේ මක් වුණාද...

බිරිඳ අහපුවම රහුමාන් මාස්ටර්... 

ෂ්ෂ්...සද්ද කරන්න එපා ඉක්මනට දොර වහන්න...

දොරත් වහගෙන රහුමාන් මාස්ටර් ගේ ඇතුළට වෙලා ඉද්දි එළවගෙන ආපු උන් එළියෙ රැකගෙන ඉන්නවා...

හරි තෝ කොයි වේලේ හරි එළියට බහීවිනෙ එතකොට අල්ලගන්නංකො...

එළියෙ ඉන්න උන් කියද්දී රහුමාන් මාස්ටර්ට පණ බයයි.මේ උගුලෙන් බේරෙන හැටි කල්පනා කරමින් හිටපු රහුමාන් මාස්ටර්ට හොඳ දීප්තිමත් අදහසක් හිතට ආවා.

ජනේලෙ ලඟට ගියපු රහුමාන් මාස්ටර් විස්ල් එක පිම්බම බලපු එකෙකුට මාස්ටර් අතින් කතාකළා.ඒ මනුස්සය ජනේලෙ ලඟට ආපු ගමන් රහුමාන් මාස්ටර් සාක්කුවෙන් රෙඩ් කාඩ් එක ඇදල අරං ඌට පෙන්නුවා.